Фудбалскиот клуб Црвена звезда во последен момент го комплетираше ростерот за Лигата на шампионите. Тројца фудбалери ги засилија редовите на српскиот шампион. За нивните трансфери клубот потроши 9.300.000 евра.
Репрезентативецот на Јужна Кореја, Хван Ин-бом, стана најскапото засилување во клупската историја. За неговиот трансфер Црвена звезда на Олимпијакос му плати 5.000.000 евра. Тој со „Црвено-белите“ потпиша договор до 2027 година. Игра во средниот ред.
Хван во Европа играше и за Рубин од Казан, а потоа се пресели во Олимпијакос каде на 40 натпревари постигна 5 гола. За репрезентацијата на Јужна Кореја одигра 45 натпревари и постигна 5 гола. Играше на Мундијалот во Катар.
Неколку часа пред Хван, во Белград пристигна напаѓачот Шериф Ндјаје. Сенегалецот во Црвена звезда дојде од Адана Демирспор. Фиксниот дел од трансферот изнесува 4.000.000 евра, плус турскиот клуб може да заработи уште 1.000.000 евра доколку бидат реализирани клаузулите во договорот. 27-годишниот Сенегалец нема настапи за својата репрезентација.
„Црвено-белите“, исто така го потпишаа и дефанзивецот од Буркина Фасо, Насер Џига. Џига оваа сезона е позајмен од Базел, а Црвена звезда по завршувањето на сезоната ќе може да го откупи неговиот договор за 2.000.000 евра. Има 2 настапа за неговата репрезентација.
