Facebook ја „оствари“ најголемата дневна загуба во историјата на Волстрит.
Вредноста на Meta, чадор-компанијата на Facebook, падна за повеќе од 26 отсто бидејќи инвеститорите беа разочарани од послабите од очекуваните деловни резултати и стагнацијата на бројот на корисници на социјалната мрежа.
Ова е најлошиот ден на берзата во историјата на Facebook. Пазарната вредност на компанијаta падна за 200 милијарди долари, што е најголема дневна загуба досега забележана на Волстрит.
Под притисок беа и акциите на другите социјални мрежи, па цената на Twitter падна за повеќе од 5 отсто, а на Snap за повеќе од 23 отсто. Не беа поштедени ниту другите технолошки гиганти. Акциите на Alphabet и Microsoft паднаа за повеќе од 3 отсто, а Amazon.com речиси 8 отсто.
Технолошкиот сектор силно порасна во последниве години благодарение на опкружувањето со ниски камати, но тој период се ближи кон крајот бидејќи клучните каматни стапки на американската централна банка се очекува да се зголемат во март.
И шефот на Facebook Марк Закерберг имаше лош ден на берзата. Закерберг е убедливо најголемиот поединечен акционер во компанијата, а бидејќи цената на акциите падна во четвртокот, вредноста на уделот на Закерберг во компанијата падна за повеќе од 30 милијарди долари.
