Милан и Интер веќе се во Саудиска Арабија каде ќе ги вкрстат копјата во борба за првиот трофеј сезонава, популарната Суперкопа Италиана. Натпревар како за спортска така и за финансиска стимулација.
Закажан за среда (18 јануари) на „Кинг Фахд“ стадионот во Ријад, овој италијански Суперкуп ќе биде последен кој се игра во Саудиска Арабија согласно договорот со Лега Серие А од ноември 2018 година. Тој договор им даде на лигата и на клубовите финансиски бенефит, нешто што Милан и Интер се среќни што неделава ќе го добијат.
Како што наведува Calcio e Finanza, секоја Суперкопа вреди околу 7,5 милиони евра, со тоа што 10% од оваа сума оди кај Лега Серие А, односно 750 илјади евра. Останатите 90% (6,75 милиони) се делат помеѓу двата клуба кои се борат за пехарот, со тоа што победникот освојува само 500 илјади евра повеќе од поразениот. Така, освојувачот ќе се врати во Милано со добивка од 3,625 милиони, додека поразениот со 3,125 милиони евра.
Сумата од 7,5 милиони евра ќе беше помала доколку на натпреварот учествуваше клуб кој не е од големата четворка Интер, Милан, Јувентус или Рома, како што бараа Арапите во договорот, искажувајќи желба најреномираните клубови да се борат за пехарот.
Милан се избори за настап како освојувач на Скудетото лани, додека Интер поради триумфот во Копа Италија. Воедно, Интер е и актуелен освојувач откако лани го совлада Јувентус. Но, портади рестѕрикциите со ковид-пандемијата, тој суперкуп, како и оној во 2021 година, се играа во Италија без публика или со ограничен број на гледачи.
„Росонерите“ по 12-ти пат ќе играат за суперкуп пехарот, а досега го имаат подигнато 7 пати. Интер има еден настап помалку (ова му е 11-ти), како и еден триумф помалку (има 6). Милан последен пат триумфираше во 2016 година.
