Неубави вести доаѓаат од Камерун. Синоќа пред напреварот на домашната репрезентација против Комори дошло до стампедо пред стадионот во кое досега се потврдени осуммина загинати меѓу кои и дете, а тешко повредено е бебе.
Камерун синоќа со 2:1 славеше над Коморските Острови и се пласираше во четвртфиналето од Африканскиот куп на нации, чиј домаќин е.
Но, победата ја засени стампедото кое се случило непосредно пред натпреварот и во кое, според камерунските медиуми, загинале 8 лица меѓу кои и едно дете, а околу 50 се пренесени во болница поради повреди. Се стравува дека бројката на загинати може да поране бидејќи некои од хоспитализираните се со тешки повреди.
„Осум смртни случаи се забележани, две жени и двајца мажи во своите 30-ти, едно дете и едно тело кое семејството го зеде со себе“, соопштија од камерунското министерство за здравство.
Меѓу тешко повредените е и едно бебе кое веднаш било пренесено во болницата „Месаси“ во главниот град Јаунде, околу 3 километри од стадионот „Пол Бија“ кој има капацитет од 60.000 гледачи.
„Дојде до гужва која резултираше со стампедо. Чекаме попрецизни информации за бројот на загинати во овој трагилен инцидент“, наведе организаторот на првенството.
Натпреварот се одигра без закаснување, а многумина ги запрепасти тоа што натпреварот се играше како ништо да не се случило. Инаку, Камерун едвај победи со 2:1 иако Комори настапија со лев бек на голот откако поради повреда нивниот прв голман не ни беше во комбинација, а неговите две резерви имаа коронавирус. Воедно, уште од 7. минута Комори играа со десетмина поради црвен картон. Камерун поведе со голот на Карл Токо Екамби во 29. минута, на 2:0 зголеми Венсат Абубакар во 70-тата, а во 82. минута Јусуф М'Шангама ја врати неизвесноста погодувајќи за 2:1.
Во четвртфиналето Камерун ќе игра против дебитантот Гамбија.