Претседателот на шпанската Ла Лига, Хавиер Тебас, најави денеска можно враќање на навивачите на стадионите во април, во зависност од текот на процесот на вакцинирање против COVID-19.
Натпреварите во шпанската прва и втора лига се играат без навивачи од минатиот март, кога фудбалот во земјата беше во прекин три месеци поради пандемијата, а сезоната беше завршена во текот на летото.
Одговарајќи на новинарско прашање околу можноста за враќање на публиката на стадионите, Тебас рече дека сега е поголем оптимист и оти клучни ќе бидат следните неколку недели.
– Сѐ ќе зависи од следните две или три недели. Доколку во февруари се зголеми бројот на вакцинирани и се намали бројката на заразени, постои можност навивачите во април и мај да дојдат на стадионите, оцени Тебас за радио Cadena SER.
Тој додаде дека „сите се наоѓаме на крајот од тунелот“ во борбата против коронавирусот.
