Италијанскиот селектор вели дека освојувањето на ЕУРО 2020 било премногу лесно, па затоа сега „Аурите“ требало да се помачат за да дојдат до Мундијалот.
Роберто Мначини беше затекнат на еден настан утринава во Рим, па мораше да поразговара малку и за претстојниот бараж за пласман на Мундијалот во Катар кој неговите избраници ќе го играат против Македонија.
„Момците беа одлични за време на Европското првенство. Веднаш почувствуваа спокој. Ни беше потребна и малку среќа, но алхемијата ни беше неверојатна“, рече тој.
Италија играше полетно и самоуверено летоска на континенталниот собир и апсолутно заслужено на крајот го подигна пехарот, иако во финалето за победата против Англија беа потребни пенали.
Потоа следуваше една сосема друга слика, една поинаква Италија која делуваше заситено и потценувачки према противниците во квалификациите за Мундијалот во Катар. Лошите резултати како ремито дома против слабата Бугарија, двете ремија против Швајцарија, а оној вториот со промашен пенал за победа, како и последниот натпревар и оние 0:0 во Белфаст кај Северна Ирска, ја оставија Италија без пласман во Катар испраќајќи ја во баражот во март.
„Некако сѐ мина многу лесно на тоа ЕУРО“, низ смеа вели Манчини, за потоа да додаде: „Ни беше потребна малку потешкотија“, алудирајќи на тоа дека до Мундијалот ќе мора да стигне преку потешкиот пат.
Италија на 24 март во Палермо ќе ја пречека Македонија во полуфиналниот бараж, а доколку победи потоа ќе мора да игра финален бараж на гостински терен кај победникот од дуелот меѓу Португалија и Турција.