Килијан Мбапе е на продажба, пишуваат француските медиуми Le Parisien и L'Équipe.
На ПСЖ му е доста од тоа што Мбапе го влече со месеци. Исто така е познато колку ПСЖ бара најдобриот млад фудбалер во светот. Сумата е 200 милиони евра за 22-годишниот Французин, што е значително повеќе од 180 милиони евра, кои ПСЖ ги плати за неговото доведување од Монако пред четири години.
Француските дневни весници пишуваат дека во ПСЖ се лутат што Мбапе ги влече со месеци и ги одбива понудите за продолжување на неговиот договор, кој завршува во 2022 година.
ПСЖ секој ден е сѐ поблизу до губење на играчот кој Пеле го прогласи за свој наследник, и тоа за многу помалку пари отколку што вреди. Претстојниот летен преоден рок е последниот во кој ПСЖ може да го продаде Мбапе со заработка или барем враќање на обесштетувањето, додека следната зима би отишол на половина цена, а следното лето бесплатно.
ПСЖ до ваква одлука дојде поради однесувањето на Мбапе во преговорите за продолжување на договорот.
„На последните неколку состаноци за време на преговорите за продолжување на договорот, ПСЖ му понуди на Мбапе нов договор на четири или пет години и плата во согласност со тешката ситуација предизвикана од корона-кризата, но Мбапе постојано бара повеќе време за размислување. Сега има многу малку време, а нему тоа не му значи многу“, пишува L'Équipe.
Угледниот париски весник наведува дека постојат две големи пречки за престојот на Мбапе во ПСЖ. Првиот е дека тој бара двојно поголема плата од таа што ја има. Тој во моментов заработува 17,5 милиони евра годишно, и бара 35 милиони за продолжување на договорот, што би го направило рамноправен со Нејмар и ќе му се придружи на третото место на најплатените фудбалери во светот. ПСЖ тоа ниту го сака, ниту може да му го даде.
Второто е дека Мбапе е убеден дека слабата француска лига не е вистинското место за неговиот развој и напредок. Хет-трикот кој неодамна го постигна против Барселона на „Камп Ноу“ само ја зацврсти неговата желба да игра против најсилните клубови што е можно поскоро во текот на целата година, а не само во Лигата на шампиони.
Французите пишуваат дека само три клуба се во трка за Мбапе. Тоа се Реал Мадрид, Ливерпул и Манчестер Сити. Сите го сакаат, но прашање е кој може да ги исполни неговите барања без да ја наруши веќе кревката финансиска структура.