Лука Модриќ им рекол на челниците на Реал дека не планира да оди во друг клуб и дека ја одбил понудата од Саудиска Арабија, пренесува новинарот Томаш Гонзалес-Мартин.
Капитенот на хрватската репрезентација има договор со Реал до крајот на сезоната и се уште нема добиено понуда за продолжување на соработката.
„Модриќ му кажа на Реал дека сака да остане уште една година и дека одбива огромна понуда од Саудиска Арабија. Тие му понудија 60 милиони евра за двегодишен договор, но тој сака да остане во Реал и да се пензионира во мадридскиот клуб“, тврди Гонзалес-Мартин.
„Агентот на Модриќ во изминатите месеци им кажа на челниците на Реал дека Модриќ има понуда од Саудиска Арабија, а тоа ги натера Перес и другите да помислат дека Модриќ може да го напушти Мадрид. Сега Модриќ реши лично да им каже на челниците на Реал, без посредник, дека ја одби понудата од Саудиска Арабија“.
Истиот извор наведува дека 37-годишниот Модриќ има поддршка од семејството и дека сите сакаат да останат во Мадрид. Модриќ е во Реал од 2012 година и наводно заработува околу 10 милиони евра годишно.
