Наоми Кембел покажа дека добриот дизајн нема „рок на траење“ кога синоќа се појави на црвениот тепих на Канскиот филмски фестивал во винтиџ фустан на Chanel.
Легендарната манекенка присуствуваше на премиерата на филмот Furiosa: A Mad Max Saga, а за таа прилика ги воодушеви сите појавувајќи се во фустанот што првпат го носеше во 1996 година.
Станува збор за креација на Chanel создадена од Карл Лагерфелд и беше дел од колекцијата есен/зима ’97 година.
Црниот фустан со светки има проѕирни делови, а за разлика од 1996 година кога Кембел носеше постава под фустанот, во Кан се појави без неа, а под проѕирните ленти се гледаше црна долна облека.
Стајлингот е дело на Ло Роуч, кој во Холивуд го нарекуваат „архитект на имиџ“, а токму тој е одговорен за статусот на Зендаја како модна икона во последно време.
Фустанот има бисерни ремени, а парчето го спои со шпицести салонки и висечки дијамантски обетки.
Манекенката привлече значително внимание носејќи го истиот фустан по 28 години, а корисниците на социјалните мрежи се прашуваа дали е можно таа да изгледа уште подобро од тогаш.
Филмот Furiosa: A Mad Max Saga, на чија премиера присуствуваше Кембел, е постапокалиптичен акционо-авантуристички филм во режија на Џорџ Милер. Тоа е петтиот дел од франшизата Mad Max и служи како спин-оф и приквел на Mad Max: Fury Road.
Оваа година, членови на жирито на Канскиот фестивал се Грета Гервиг, Ева Грин и Лили Гладстон, а на церемонијата на отворањето на Мерил Стрип и беше врачена почесната Златна палма, која се доделува како признание за нејзиниот придонес во филмот.
Филмскиот фестивал во Кан во 2024 година ќе трае од 14 до 25 мај 2024 година.
