Светската програма за храна ја доби Нобеловата награда за мир за нејзините напори во борбата против гладот и несигурноста во снабдувањето со храна низ целиот свет (UN WFP), објави претседателката на норвешкиот Комитет за Нобеловата награда Берит Рајс-Андерсен.
Иако Комитетот чува во апсолутна тајност кој кандидат го смета за свој фаворит, на објавувањето на добитникот на наградата секогаш му претходат шпекулации.
Оваа година, како фаворити се спомнуваа шведската активистка против климатските промени Грета Тунберг, рускиот дисидент Алексеј Навални и Светската здравствена организација за нејзините напори во борбата против пандемијата на COVID-19.
Меѓу кандидатите за Нобелова награда за мир беа 211 поединци и 107 организации. Номинациите можат да бидат предложени од специфични групи, вклучително законодавци и државни лидери и одредени меѓународни институции.
Крајниот рок за номинации беше 1 февруари, што значи дека оние кои се на првата линија во борбата против COVID-19, која беше прогласена за пандемија во март, веројатно не се најдоа меѓу кандидатите.
Наградата доаѓа со 10 милиони норвешки круни или близу 935.000 евра и златен медал што ќе се додели на церемонијата во Осло на 10 декември. Овогодинешната церемонија ќе се одржи во намален обем поради пандемијата.
Досега беа објавени добитниците на Нобеловата награда за медицина, физика, хемија и литература. Добитникот на Нобеловата награда за економија ќе биде објавен следната недела.
