Добитнички на Нобеловата награда за хемија во 2020 година се две генетичарки, Французинката Емануел Шарпентие и Американката Џенифер Дудна, за нивното достигнување во истражувањето за CRIPSR-Cas9 методата во уредување на геноми, објави шведската Кралска академија на науки.
Станува збор за унапредување на еден од најострите алати во генетската технологија, стои во соопштението.
„Оваа технологија имаше револуционерно влијание на науката и придонесе за развој на нови терапии против канцерот за да може да се оствари сонот на научниците во лекувањето на наследни болести“, стои во објаснувањето.
„Способноста на уредување на ДНК-та со помош на оваа технологија внесе револуција во науката“, изјави пред новинарите Пернила Витунг Стафшед, членка на Академијата.
Станува збор за моќна алатка која во основа може да поправи мутации кои доведуваат до генетски нарушувања кај луѓето. Се употребува за исправање на генетски мутации и во лекување на ретки болести.
Шарпентие (51) и Дудна (56) ќе ја поделат паричната награда од 1,1 милион долари.
