На повеќето европски берзи цените на акциите утринава паднаа, по вчерашниот раст, бидејќи високата инфлација може да ја наведе Европската централна банка (ЕЦБ) да ја заостри монетарната политика побрзо од очекуваното.
Инвеститорите се претпазливи
Индексот STOXX 600 на водечките европски акции во 9 часот и 30 минути беше намален за 0,3 отсто, откако вчера порасна за околу 0,6 отсто. Утринава лондонскиот FTSE индекс зајакна 0,11 отсто, на 7608 поени, додека франкфуртски DAX се лизна за 0,60 отсто, на 14.488 поени, а париски CAC 0,66 отсто, на 6519 поени.
По вчерашниот раст, утринава берзанските индекси загубија дел од добивката бидејќи инвеститорите се загрижени од високата инфлација. Вчера беше објавено дека инфлацијата во Германија во мај достигна 8,7 отсто, повеќе од очекувањата на аналитичарите и значително повеќе од еден месец претходно. Затоа, инвеститорите се претпазливи пред денешните извештаи за инфлацијата во Франција, Италија и еврозоната.
Цените на акциите пораснаа на азиските берзи
Доколку инфлацијата продолжи да расте, инвеститорите стравуваат дека ЕЦБ ќе мора да ги зголеми клучните каматни стапки побрзо од очекуваното. Централната банка во последните денови сигнализираше дека по многу години каматните стапки би можеле да почнат да растат во јули.
А на азиските берзи цените на акциите пораснаа, па така индексот на акции на Азија и Пацифик MSCI, без јапонскиот, околу 9:30 часот порасна за 0,6 отсто, откако вчера скокна за повеќе од 2 отсто.
На токиската берза индексот Nikkei падна за 0,3 отсто, додека цените на акциите во Австралија се лизнаа за еден отсто. Меѓутоа, во Јужна Кореја, Хонгконг и Шангај тие се зголемија меѓу 0,6 и 1,1 отсто.
По вчерашниот силен скок на цените на акциите, тргувањето на азиските берзи утрово е помирно, меѓу другото и поради немање насоки од Волстрит, бидејќи поради празниците во понеделник најголемата светска берза не работеше.
„Ситуацијата се подобрува, но не доволно“
Инвеститорите се претпазливи и за новите знаци за забавување на растот на кинеската економија. PMI индексот на производствена активност во мај изнесуваше 49,6 поени, повеќе од претходниот месец, но сепак под нивото од 50 поени, што укажува на слабеење на активноста.
„Ситуацијата се подобрува, но не доволно“, вели Бо Жуанг, аналитичар во Loomis Sayle.
Економскиот раст на Кина забавува со месеци поради политиката на нулта толеранција за коронавирусот, што ги натера властите да затворат многу градови. Но, како што ситуацијата се подобрува во последните недели, властите постепено ги олеснуваат рестриктивните мерки.
Инвеститорите се претпазливи и од знаците на слабост во другите економии во регионот, додека централните банки мораат да ги зголемат каматните стапки поради високата инфлација, како што направија монетарните власти на Јужна Кореја и Нов Зеланд минатата недела.
