Македонскиот капитен многу добро знае кој е голем фаворит вечерва, но фудбалот е игра во која изненадувања секојдневно се случуваат.
Ако можеа Грција и Украина да одиграат 1:1 на гости кај колосите Шпанија и Франција пред недела дена, зошто да не можеме и ние да останеме непоразени во Германија?
Горан Пандев играл против германски екипи, но вечерва и тој како и македонската репрезентација за прв пат ќе се соочи со четирикраткиот светски шампион Германија.
„За нас е чест што ќе играме против голем противник. Ние сме подготвени да го дадеме максимумот, иако ова ќе ни биде трет натпревар за седум дена“, почна Пандев на официјалната прес-конференција.
„Германците знаат против кого играат, знаат со каков квалитет располагаме и сигурно одлично ја анализирале нашата игра. Но, ние сме сосема различна репрезентација од пред пет или шест години, сега сме далеку посилни, сега сме учесници на ЕУРО и сметам дека и противникот ќе биде претпазлив“, смета тој.
Нема дилема кој е фаворит, но фаворитската улога треба и да се одбработи на терен, а за резултатот се прашува и противникот. Токму тука е нашата шанса.
„Тие се фаворити, тоа е јасно, но мораме да веруваме во себе и да веруваме дека може да ги изненадиме“, заврши Пандев.
Натпреварот е вечерва од 20:45 часот на „Шауинсланд-Рајзен-Арена“ стадионот во Дујсбург, а пренос ќе врши SportKlub 3.
