На повидок е локдаун и во Премиер лигата откако тројца фудбалери на „Лисиците“ се ставени во изолација бидејќи покажале симптоми на коронавирусот, се чекаат резултати од тестовите.
Тренерот на Лестер, Брендан Роџерс, потврди дека тројца нивни играчи се изолирани од тимот и ставени во карантин откако кај нив се појавиле симптоми идентични како оние на коронавирусот. Веќе им се направени тестови и се чека на резултатите кои ќе бидат готови вечерва. Од клубот не ги објавуваат имињата на играчите.
„Клубот ги презема сите мерки на претпазливост, а воедно располагаме и со одличен медицински персонал. Ситуацијата е под контрола. Тројцата играчи ги изолиравме од остатокот од тимот“, изјави стартегот Роџерс.
Лестер в сабота од 13:30 часот треба да игра на гости кај Вотфорд, но доколку и само еден играч излезе позитивен на корона вирусот натпреварот сигурно ќе биде одложен.
„Ќе биде штета доколку натпреварот треба да се одложи, но во овој момент здравјето има приоритет. Натпревари пред празни трибини? Фудбалската игра има две главни алки, играчи и навивачи. Без било која од тие компоненти нема да има смисла“, смета лестеровиот тренер кој доаѓа од Северна Ирска.
Во понеделникот Лестер играше дома со Астон Вила, па евентуална потврда на зараза кај „Лисиците“ ќе предизвика карантин и кај Астон Вила и потоа веројатно локдаун и во Премиер лигата.
