Селекторот на иранската репрезентација излезе со остри критики на сметка на ФИФА и користењето на ВАР системот, по болното реми со Португалија. На неговиот тим многу малку му требаше да победи и да го елиминира европскиот првак во групата од Светското првенство во Русија.
Карлос Кеирош смета дека неговиот сонародик Кристијано Роналдо требаше да биде исклучен по ударот со лакт на десетина минути пред крајот на натпреварот.
„Реално е да ја прекинеш играта, да го погледнеш ВАР системот и да го видиш тој лакт. Удирањето со лакт е казниво со црвен картон според правилата. Сепак, тоа не важи кога се работи за Меси или Роналдо. Овде не станува збор за судиите, туку за став, храброст и карактер. Одлуките мора да бидат јасни за сите, (Џани) инфантино и ВАР системот не одат во во правилна насока“, смета Португалецот на клупата на Иран кој дополнително беше изнервиран што судијата Енрике Касерес од Парагвај ја прегледа снимката и наместо црвен, му покажа жолт картон.
Иран после ова реми го заврши натпреварувањето на Мундијалот во Русија бидејќи остана со бод помалку од Шпанија и од Португалија.
Во осмина финалето Шпанија ќе игра со домаќинот Русија, а Португалија ќе се соочи со Уругвај.
