Профитите на авиокомпаниите ширум светот ги надминаа нивоата пред пандемијата во 2023 година благодарение на повисоките цени на билетите, објави Меѓународната асоцијација за воздушен транспорт (IATA).
Повисоките цени на билетите им помогнаа на авиокомпаниите да го надминат профитот пред пандемијата за прв пат откако пандемската криза го запре воздушниот сообраќај во 2020 година, соопшти здружението.
Авиокомпаниите остварија профит од 27,4 милијарди долари минатата година, 1 милијарда долари повеќе отколку во периодот пред пандемијата 2019 година, објави IATA на генералното собрание во Дубаи.
Здружението и годинава предвидува раст на профитот, проценувајќи дека тој би можел да надмине 30 милијарди долари.
Половина од глобалниот профит годинава ќе го генерираат превозниците во Северна Америка, кои треба да инкасираат 14,8 милијарди долари, исто како и минатата година.
Европските превозници треба да го зголемат својот профит од минатогодишните 8,6 милијарди на 9 милијарди долари, проценува IATA.
