Македонскиот ракометен првак Вардар 1961 ја забележа премиерната победа во новата сезона во СЕХА лигата, откако вечерва триумфираше на гостувањето кај новосадска Војводина со 26:16 (11:9) во рамки на вториот натпревар во групата Б.
По стартниот пораз минатата недела во Скопје од хрватски Нексе, ракометарите на Вардар овој пат прикажаа поквалитетна игра, особено во вториот дел, кога со серија од 3:0 прво поведоа со 14:9, а со нова серија од 6:0 дојдоа и до двоцифрена предност од 22:11 која за одржуваа до крајот за конечен резултат од 26:16 среде Нови Сад.
Најефикасни во редовите на македонскиот состав беа Тимур Дибиров со 7 и Оливје Нјокас со 4 голови.
Вардар на 18 февруари во Нашице ќе има можност да му се реваншира на Нексе за стартниот пораз, во рамки на 3. коло во групната фаза.
Синоќа победа на српска територија оствари и Еурофарм Пелистер кој славеше над Партизан во Белград.