По неколку неславни обиди изминативе сезони, тимот на Пари Сен Жермен успеа да стигне до финалето од Лигата на шампионите откако синоќа го декласираше Лајпциг со 3:0.
Популарните „Светци“ ја контролираа играта умешно криејќи ја топката од германскиот претставник кој исто така се бореше за историски успех.
Резултатот го отвори Бразилецот Маркињус кој со глава ја затресе мрежата по одличното нафрлување од слободен удар на Анхел Ди Марија.
ПСЖ зголеми на 2:0 на три минути пред паузата и тоа по вина на унгарскиот голман Петер Гулачи која со непрецизен пас наместо на свој соиграч додека кон противнички играч. Акцијата заврши со гол откако Нејмар со пета асистираше до Ди Марија.
Аргентинецот се вмеша и во голот кој стави точка на натпреварот. Во 58. минута Ди Марија го пронајде Хуан Бернат кој со глава го совлада Гулачи.
ПСЖ за првпат во својата историја се избори за финале во Лигата на шампионите. Кон такво нешто катарските сопственици се стремеа уште од 2011 година кога го купија клубот, но немаа успех, дури досега. ПСЖ има само два европски трофеја и тоа по еден во Интертото Купот во 2001 и во Купот на победниците на куповите во сезоната 1995/96.
Противникот на ПСЖ ќе се знае вечерва откако силите ќе ги одмерат Лион и Баерн. Финалето е закажано за в недела од 20 часот во Лисабон.