Рускиот претседател Владимир Путин одржа уште еден од серијата разговори со францускиот претседател Емануел Макрон, со кого разговараше за војната во Украина, но и за крајните цели на Русија во оваа земја.
Според соопштението од Кремљ, Путин за време на разговорот гo коментирал последното обраќање на Макрон кон Украинците и изјавил дека не се согласува со многу од тезите изнесени во неговиот говор.
„Ова особено се однесува на изјавата на Емануел Макрон, кој изјавите дека Русија се бори против нацизмот во Украина ги нарече лага. Во таа насока, му беа дадени детални објаснувања за важната улога на неонацистите во државната политика на Киев“, објави Кремљ.
Нарекувајќи ја војната во Украина „специјална операција за заштита на Донбас“, Кремљ соопшти дека Русија има намера да продолжи да се бори со националистичките вооружени групи во Украина.
„Имаме намера да ја продолжиме бескомпромисната борба против милитантите на националистичките вооружени групи кои вршат воени злосторства, вклучително и поставување воена опрема во станбените населби и користење на цивили како жив штит“, соопшти Москва.
Претседателот на Руската Федерација ги повтори своите ставови за ситуацијата во Донбас и рече дека со години се прикрива геноцидот врз цивилите во оваа област, што доведе до бројни жртви и принуди стотици илјади луѓе да бараат азил во Русија.
„Путин повторно детално ги изложи основните пристапи и услови во контекст на преговорите со претставниците на Киев и потврди дека пред сѐ се работи за демилитаризација и неутрален статус на Украина. Беше истакнато дека времето само ќе доведе до дополнителни барања од Киев во нашата преговарачка позиција“, соопшти Кремљ.
Новиот разговор меѓу Макрон и Путин беше и трет од почетокот на војната во Украина. Исто така, лидерите на Русија и Франција интензивно разговарале и пред почетокот на руската инвазија на Украина, а темите на кои разговарале биле руските безбедносни барања и европската безбедносна политика.
