Хрватскиот креативец откри дека Кристијано Роналдо го убедувал да му се придружи во торинскиот клуб, но откупната цена која ја барала Барса била непремостлива пречка.
Ова Иван Ракитиќ го откри говорејќи за загрепскиот дневен весник 24sata. Тоа не се случило летово, туку во 2019 година.
„Кристијано лично ми се јави и ми сугерираше да дојдам во Јуве. Ми рече дека клубот ме посакува, но сепак трансферот не се реализираше. Барселона бараше 50 милиони евра, што беше премногу“, вели тој.
Дека побарувањата на Барса биле навистина крајно нереални говори и фактот што една година подоцна Ракитиќ се пресели во Севиља за само 1,5 милиони евра.
„Роналдо е еден од најголемите на сите времиња. Навистина човек ужива кога го гледа, како и што прави сега во Јувентус“, додава Хрватот кому не му се исполни желбата да игра во ист клуб со Португалецот.
Родум од Швајцарија, Ракитиќ почна во Базел, а потоа преку Шалке и Севиља стигна до колосот Барса, од каде потоа повторно се врати во андалузиската престолнина.
На последново ЕУРО не настапи откако минатата есен одлучи да се повлече од репрезентацијата поради бројните повреди и клупските обврски.
