Саудиската професионална лига во текот на летото стана побогата за бројни светски ѕвезди, а во зимскиот преоден рок од оваа земја подготвуваат нова инвазија на фудбалскиот пазар.
Според британски The Telegraph, раководството на Саудиската професионална лига планира да ја зголеми границата за странски играчи на 10.
Тие сметаат дека зголемувањето на лимитот за странски фудбалери ќе го подобри имиџот на натпреварувањето и ќе му даде на саудиското првенство поголема моќ на светскиот пазар.
Во моментов клубовите од Саудиска Арабија можат да имаат 8 фудбалери од странство.
Во јануари 2023 година, португалскиот репрезентативец Кристијано Роналдо се пресели во Ал Наср и ја отвори вратата за пристигнувањето на бројни светски ѕвезди во таа арапска земја. Веќе во летниот преоден рок, тамошните клубови потрошија вкупно речиси една милијарда евра за ангажирање нови играчи.
Меѓу играчите кои дојдоа во Саудиска Арабија се Ријад Махрез, Карим Бензема, Александар Митровиќ, Сергеј Милинковиќ-Савиќ, Малком, Нејмар, Едуард Менди, Фабињу, Садио Мане, Емерик Лапорт, Марцело Брозовиќ, Алекс Телес, Јаник Караско, Калиду Кулибали, Рубен Невеш, Џордан Хендерсон, Џорџињо Вајналдум…
