La Gazzetta dello Sport пишува дека Андреа Пирло има два натпревари пред него кои ќе решат дали ќе ја задржи работата во Јувентус.
Во сабота Јувентус игра против Торино, а во среда го пречекува Наполи.
La Gazzetta dello Sport пишува дека Пирло ќе добие отказ во случај на „негативен резултат“. За Јувентус негативен резултат е и реми, бидејќи во моментов заостануваат десет бода зад лидерот на табелата Интер.
Во случај Пирло да добие отказ, Игор Тудор би го наследил, дознава Calciomercato. Тоа би значело дека Хрватот ќе го води Јуве до крајот на сезоната.
Ако информациите на италијанските спортски медиуми се точни, Тудор ќе го наследи Пирло на клупата на „Старата дама“ по првата „сопка“ на Италијанецот. Поточно, ова веќе може да се случи до крајот на неделава ако Јувентус не слави на градското дерби кај Торино.
За потсетување, Пирло ја започна тренерската кариера во Јувентус. Првично требаше да го предводи тимот до 23 години, но потоа управата го назначи за тренер на првиот тим во август, по отказот за Маурицио Сари.
Јуве испадна во осминафиналето од Лигата на шампиони од Порто, а сезоната може да се спаси до одреден степен со освојувањето на домашниот куп, во кој игра против Аталанта. Јуве го освои Суперкупот во јануари против Наполи.
Јувентус во сабота од 18 часот игра против Торино.