Домаќинот на Африканскиот куп на нации, Брегот на Слоновата Коска, со пресврт и победа од 2:1 во големото финале го совлада фаворитот Нигерија и по третпат стана континентален шампион.
Откако едвај ја минаа групата со само една победа и два пораза, и тоа 1:0 токму од вечерашниот противник и 4:0 понижувањето од Екваторијална Гвинеја, популарните „Слонови“ првенството го завршија со бајка. Среде турнир направија и промена на селекторот врачувајќи му отказ на францускиот стратег Жан-Луи Гасет и го назначија домашниот стратег и дотогашен асистент Емерс Фае за в.д. селектор.
На преполниот „Аласан Уатара“ стадионот во Абиџан прва поведе Нигерија преку Вилијам Трост-Еконг кога во 38. минута со глава го матираше Јахја Фофана.
Домаќините се мачеа да се вратат во игра и делуваше дека „Супер Орлите“ ја контролираат играта. Конечно стадионот еруптираше во 62. минута кога Франк Кесие израмни, исто со глава.
Двете екипи се гледаше дека не сакаат да играат продолженија, па нападите наизменично се менуваа. Победничкиот гол беше мала мајсторија на Себастјан Алер во 81. минута кога со скок удар со нога во стилот на Златан Ибрахимовиќ го претвори во гол нафрлувањето на Симон Адингра. Токму Адингра на крајот беше прогласен за МВП на финалето.
Нигерија не успеа да израмни и по 7 минути надополнување мавританскиот судија Баан Беида означи крај.
Интересно, ова беше петто финале за Брегот на Слоновата Коска, а во претходните четири секогаш победникот се решаваше на пенали и тоа, внимавајте, откако сите четири завршуваа 0:0. „Слоновите“ не само што прв пат постигнаа гол во едно финале, туку и конечно нивно финале заврши во регуларниот дел. Брегот на Слоновата Коска претходно ја освојуваше Африка на првенствата во 1992 и 2015 победувајќи ја двапати Гана, а губеше во 2006 и 2012 од Египет и Замбија.
За Нигерија ова беше осмо финале, а по петти пат остана без пехарот. „Супер Орлите“ имаат 3 титули од првенствата во 1980, 1994 и 2013.
Синоќа во натпреварот за третото место Јужна Африка го совлада ДР Конго на пенали 6:5 откако по 120 минути игра немаше голови.
Најдобар стрелец на турнирот со 5 гола е Емилио Нсуе од Екваторијална Гвинеја, па тој ја освои Златната копачка.
Златната ракавица за најдобар голман замина во рацете на Ронван Вилијамс, голманот на Јужна Африка.
Капитенот на поразениот финалист, Вилијам Трост-Еконг, ја освои утешната награда за МВП на првенството. Како за стопер беше одличен голгетер бидејќи покрај голот во финалето претходно постигна уште два.
Наредното африканско првенство ќе се игра во јуни и јули 2027 година во Мароко.
