Секој родител понекогаш се запрашува дали можеби е премногу строг со децата за некои работи.
Експертите предупредуваат дека постојат знаци кои јасно можат да покажат дали сте премногу строг родител, пишува Very Well Family.
Иако е важно да се имаат јасни правила кога станува збор за родителството, подеднакво е важно да се признае дека постојат исклучоци од правилата. Наместо да заземате авторитарен став за сè, експертите препорачуваат да покажете подготвеност да го оцените однесувањето на детето во контекст на околностите.
Иако е нормално децата понекогаш да ја кријат вистината, претходни студии покажаа дека строгата дисциплина ги претвора децата во снаодливи лажговци. Ако сте премногу строги, вашето дете најверојатно ќе лаже во обид да избегне казна или да избегне да ве налути. Можеби ќе забележите дека некои работи вам ви ги кажува поинаку, за разлика од другиот родител.
Нема ништо лошо во тоа да имате различни правила од другите родители. Меѓутоа, ако сте секогаш најстрогиот родител од сите, тоа може да биде знак дека сепак вашите очекувања се малку превисоки.
Ако забележите дека секогаш имате помалку трпение, голема е веројатноста тоа да се однесува и на вашето воспитување. Родителите треба да бидат трпеливи, особено кога се во прашање децата и поставувањето граници, советуваат експертите.
Строгите родители честопати имаат потешкотии да толерираат сè, од начинот на кој наставникот води настава до начинот на кој бабата се справува со проблемите во однесувањето кога таа ги чува внуците.
Во ред е децата да бидат изложени на возрасни луѓе кои имаат различни правила и различни типови на дисциплина.
Добро е да се има правила, но премногу правила можат да бидат штетни. Одржувајте едноставни правила и вклучете ги оние најважните кои сакате детето да ги запамти.