Руската компанија „InfoWatch Group“ што се занимава со безбедност во секоја смисла на зборот, најави смартфон што ги спречува апликациите да собираат податоци за сопственикот, да ги складира или да ги препраќа понатаму.
Смартфонот „тајга“ (TAIGA) е направен за да ја заштити деловната комуникација, документите, мејловите, фотографиите и снимките на корисникот.
На пример, Gmail е познат по тоа дека ги скенира мејловите на своите корисници за да може да им пласира реклами врз основа на податоците во тие мејлови, но преку телефонот TAIGA нема да може да го прави тоа.
Компанијата InfoWatch приреми посебна верзија на оперативниот систем Аndroid што нема да дозволи надгледување или прибирање на податоците на корисникот.
Првата пратка TAIGA телефони од околу 50.000 парчиња ќе биде дадена на користење на руските државни службеници.
TAIGA (Тајга) го доби името по сибирските снежни шуми и е најнов пример за „студената војна“ меѓу САД и Русија, оценува Mashable. Само две недели пред премиерата на телефонот TAIGA, антивируот Kaspersky Lab беше забранет во сите државни институции во САД, а интересно е што Наталија Касперски, поранешна директорка и еден од основачите на компанијата Kaspersky Lab, сега е претседателка на компанијата што го претстави телефонот TAIGA.
Русија веќе ја забрани платформата LinkedIn и се закани дека ќе ја забрани и социјалната мрежа Facebook.
Не се објавени целосните спецификации на телефонот, но се знае дека TAIGA ќе чини околу 260 долари, има Bluetooth, Wi-Fi и LTE мрежи, две камери, блиц и 5,5-инчен дисплеј.