Унгарија е подготвена да го плати рускиот гас во рубли без да ги прекрши санкциите на Европската Унија против Русија, изјави денеска унгарскиот министер за надворешни работи Петер Сијарто.
„Што се однесува до плаќањето на гасот во рубли, имаме решение кое гарантира дека нема да прекршиме никакви санкции, а во исто време обезбедуваме стабилно снабдување со гас за Унгарија“, изјави Сијарто.
Шефот на унгарската дипломатија објасни дека според шемата, филијалата на унгарската МВМ енергетска групација CEE Energy, следната сметка ќе ја плати во евра, која Газпромбанк ќе ја претвори во рубли и потоа ќе ја префрли на сметката на руски Газпром експорт.
Сијарто изјави дека опцијата за плаќање сметки во друга валута, наместо во евра, е вклучена во билатералниот договор меѓу CEE Energy и Газпром експорт, кој беше склучен во септември 2021 година, а кој сега ќе биде модифициран за да ги одрази планираните промени.
Тој не навлезе во детали, па не е јасно дали падот на руската валута на некој начин ќе влијае на новите услови за плаќање.
Сијарто потсети дека Унгарија, која се потпира на Русија во снабдувањето со најголем дел од нафтата и гасот, беше против заземање заеднички став на ЕУ за прашањето за плаќање на руската енергија во рубли, бидејќи Будимпешта тоа го смета за билатерално прашање.
