На територијата на Израел е пронајдена коска стара 1,5 милиони години, за која научниците тврдат дека е најстар доказ на човековото постоење во овој дел од светот.
Група археолози од Израел и САД пронајдоа пршлен на дете кое живеело пред 1,5 милиони години во долината Јордан. Станува збор за дете на возраст од 6 до 12 години, а пршленот се наоѓал во долниот дел на 'рбетот.
Истражувањето открило дека детето било екстремно високо, како возрасен – до 1,8 метри. Сепак, неговата висина била како и висината на повеќето други хоминиди од Источна Африка.
Онлајн изданието на Times of Israel пишува дека ова е најстариот доказ за човечко постоење во Израел, или втор најстар доказ надвор од Африка. Пронајдената коска дава увид во миграциите на различни видови хоминиди од Африка.
Врз основа на откритието на фосилни остатоци и ДНК докази, можно е да се следи еволуцијата на човекот пред 6 милиони години. Хоминидите се примати, директни предци на анатомски модерниот човек, или се тесно поврзани со анатомски модерниот човек. Анатомски модерниот човек е забележан во фосилни остатоци од пред 200.000 до 300.000 години.
Постојат докази дека одредени архаични видови луѓе почнале да ја напуштаат Африка пред 2 милиона години. Нивните први останки се пронајдени во кавкаскиот регион во Грузија, а се стари 1,8 милиони години. На локалитетот познат како Дманиси археолозите пронашле и алатки кои се користеле.
Истражувачите забележуваат дека сѐ уште се разговара дали споменатата емиграција од Африка била во еден или повеќе бранови. Неодамнешните откритија сугерираат дека тоа се случило во неколку бранови, пишува Times of Israel.
