Одлучено е натпреварот во Бари во рамките на одбојкарското Европско првенство да се игра од 18 часот, со што нема да се поклопи со вечерниот фудбалски спектакл во Скопје.
Спортските вљубеници можат да здивнат - саботната двојна пресметка на Македонија и Италија ќе биде во различен термин - за вистински спортски празник.
Прво од 18 часот во салата „ПалаФлорио“ во Бари светскиот и европски одбојкарски шампион и кодомаќин на тековното првенство, Италија, ќе ја пречека Македонија во осминафиналето од ЕвроВолеј 2023.
Македонските одбојкари по синоќешниот убедлив пораз со 3:0 од Чешка завршија на 4. место во групата Ц и со тоа налетаа на првопласираниот од групата А, велесилата Италија.
Капитенот Никола Ѓоргиев на Facebook потврди дека терминот е 18 часот.
Одбојкарите утрово полетаа со чартер лет за Бари.
Потоа од 20:45 часот в сабота следува нова пресметка меѓу Македонија и Италија, овој пат во фудбал. Во рамките на групата од квалификациите за пласман на ЕУРО 2024 на Националната Арена „Тодор Проески“ во Скопје овој пат Италијанците ќе бидат гости.
Директен пренос од двете македонско-италијански пресметки ќе врши националниот сервис МРТ.
