Цените на нафтата вчера на меѓународните пазари се задржаа на ниво од 81 долар, поддржани од оптимистичките прогнози за побарувачката и нарушувањето на понудата од Либија и Нигерија.
На лондонскиот пазар цената на барелот по пладне беше пониска за 30 центи отколку на затворањето на тргувањето вчера и изнесуваше 81,06 долари.
Речиси за исто толку барелот поевтини на американскиот пазар каде се тргуваше за 76,55 долари. Трговците вчера беа загрижени од остриот пад на кинескиот извоз во јуни, што го одразува слабеењето на глобалната економија во услови на зголемени каматни стапки и геополитички тензии. Послабиот економски раст значи и помала побарувачка за нафта.
Тие се охрабрени од ублажувањето на инфлацијата во САД, бидејќи тоа би можело да ја поттикне централната банка да го заврши циклусот на затегнување на монетарната политика. Цените беа поддржани во четвртокот и со затворањето на неколку нафтени полиња во Либија поради протестите против киднапирањето на поранешен министер. Во исто време, Шел го прекина товарењето на нигериската сурова нафта поради можно оштетување на терминалот.
Се проценува дека снабдувањето од Либија е намалено за околу 370.000 барели дневно, а снабдувањето од Нигерија за 225.000 барели дневно, според аналитичарот на PVM, Џон Еванс.
Извозот на руска нафта, исто така, значително падна и ако тој тренд продолжи следната недела, цените веројатно повторно ќе пораснат, особено ако се има предвид дека Москва официјално планира да го намали извозот во август за 500.000 барели дневно, додаваат аналитичарите на Комерцбанк.
Меѓународната агенција за енергија (IEA) и Организацијата на земји извознички на нафта (ОПЕК) прогнозираат дека побарувачката ќе зајакне во втората половина од годината, особено во Кина, и покрај неповолните макроекономски движења.
„Светлината на крајот од тунелот на построга (американска) монетарна политика е сè повидлива и инвеститорите се повеќе се уверени дека ФЕД ќе го затвори циклусот откако повторно ќе ги зголеми каматните стапки за две недели“, рече високиот аналитичар на OANDA, Крег Ерлам.
Организацијата на земјите извознички на нафта (ОПЕК) одделно објави дека цената на барел од нафтената кошничка на нејзините членки вчера пораснала за 90 центи на 81,53 долари.