На многумина им е многу полесно да заспијат со вклучен телевизор, но колку е штетна оваа навика?
Ако вклучениот телевизор ни помага да заспиеме, тогаш во што е проблемот? Иако е точно дека серијата што ја гледаме ќе ни го олесни опуштањето по долг ден, но вклучениот телевизор влијае на квалитетот на сонот повеќе отколку што мислиме.
Потсвеста постојано се вклучува
Иако може да заспиете додека гледате телевизија, тоа не значи дека потсвеста ви е целосно исклучена. Како што ликовите од серијата зборуваат и се одвива заплетот, вашиот мозок го апсорбира сето тоа.
„Изненадувачки, дури и ако заспиете пред телевизорот, вашиот мозок сепак ги перцепира сите звуци што доаѓаат од телевизорот, што предизвикува непотребен стрес кога треба да се одморите“, вели психијатарот Амелија Алвин.
Уште полошо, ако заспиете додека гледате хорор филм, тоа може да ви пречи во сонот или може да предизвика кошмари. Оваа теза е поддржана и од студија која покажа дека луѓето кои гледале насилни филмови и серии 90 минути пред спиење, имале 13 пати поголем ризик да имаат кошмари отколку оние кои гледале комична содржина.
Нивото на мелатонин се намалува
Секој ден кога сонцето ќе зајде, телото почнува да произведува поголеми количини на мелатонин. Кога ова ќе почне да се случува, вишокот мелатонин му сигнализира на телото дека е време за спиење. За жал, сината светлина што ја емитираат уредите како што се ТВ, компјутери и паметни телефони може да го наруши природниот часовник на телото и да го потисне производството на мелатонин.
Ова обично резултира со понизок квалитет на сон, а исто така ја зголемува веројатноста за често будење ноќе. Уште полошо, потешко е да се влезе во фаза на длабок сон.
Недостатокот на сон се акумулира
Недостатокот на сон се акумулира со текот на времето. Поточно, „долгот“ се натрупува, што е всушност разликата помеѓу часовите на спиење што му се потребни на телото и часовите на спиење. Кога се обидуваме да „набиеме“ неколку епизоди пред спиење, а тоа се одолговлекува до доцна во ноќта, тој долг се трупа. Постојаниот недостаток на сон може да резултира со несоница, слаб сон и замор.
Зголемување на телесната тежина
Едно истражување покажа дека жените кои спијат со вештачка светлина, како онаа од телевизор, имаат поголем ризик непланирано да се здебелат. Ризикот од здебелување дури и не зависи од квалитетот на спиењето. Ако спиеле со вклучен телевизор, без оглед дали имале проблеми со спиењето или веднаш заспале, имале поголем ризик од непланирано здебелување.
