Северноморската нафта Брент ја надмина цената од 70 долари за барел денес, за прв пат од почетокот на пандемијата на COVID-19.
Американската нафта го достигна највисокото ниво во повеќе од две години, по извештаите на медиумите за напади врз нафтената инфраструктура на Саудиска Арабија.
Цената на фјучерсите на Брент за испорака во мај минатата ноќ беше 71,38 долари за барел на азиските берзи, што е највисоко ниво од 8 јануари 2020 година, по што се спушти на 70,96 долари околу 6:11 по средноевропско време, што е пораст од 1,60 долари или 2,3 проценти во однос на претходната трговска сесија, пренесува Reuters.
Американската сурова нафта WTI за испорака во април порасна за 1,47 долари или 2,2 проценти, на 67,56 долари за барел. Пред тоа, на фјучерс-тргувањето за месецот што претстои, неговата цена достигна ниво од 67,98 долари, највисока од октомври 2018 година.
Азиските акции исто така се зголемија откако американскиот Сенат донесе закон за пакет поддршка за економијата и граѓаните вреден 1,9 милијарди долари, кон што придонесоа и позитивните економски податоци од САД и Кина, кои укажуваат на глобално закрепнување на економијата.
Јеменските Хути истрелаа ракети и напаѓаа со беспилотни летала во срцето на саудиската нафтена индустрија, вклучително и фабриката Saudi Aramco во Рас Танура, која е од витално значење за извозот на нафта, а Ријад оцени дека станува збор за неуспешен напад врз глобалната енергетска безбедност.
„Можно е да видиме ненадеен скок на берзите на нафта во блиска иднина, пред сѐ затоа што пазарот сега ќе мора да вклучи во цената и еден вид премија за ризик поради честата појава на вакви напади“, проценуваат аналитичарите на банката ING, истакнувајќи дека ова е втор напад месецов по инцидентот во Џеда на 4 март.
Цените на нафтата Брент и WTI бележат четврти последователен ден на раст по одлуката на Организацијата на земјите извознички на нафта (ОПЕК) и нејзините сојузници да останат на намалени залихи во април.
Испораките на „црното злато“ во Кина во првите два месеци од 2021 година се зголемија за 4,1 процент во споредба со истиот период минатата година, бидејќи најголемиот увозник на овој енергенс во светот го зголеми својот капацитет за обработка поради натамошниот раст на побарувачката за гориво.