Фаворитите синоќа остварија победи во првиот ден од предбожикното коло во најдобрата шпанска фудбалска лига.
Лидерот на табелата, мадридски Атлетико, имаше незгодно гостување во баскискиот Сан Себастијан кај Реал Сосиедад кој до пред некое коло беше на врвот, но потоа почна да паѓа. Откако првиот дел заврши без голови, мадриѓаните го отворија резултатот четири минути по паузата преку Марио Ермосо, а во 74. минута Маркос Љоренте ја потврди победата.
Атлетико останува на врвот со 32 бода, додека Сосиедад никако да излезе од кризата која веќе трае веќе шест натпревари без победа и тоа со три последователни порази.
Барселона немаше проблеми на гостувањето кај Ваљадолид остварувајќи победа од 3:0. Клемен Ленгле во 21. минута на асистенција на Меси го отвори резултатот, водството го дуплираше Мартин Брејтвејт во 35-тата, а конечниот резултат го постави Меси во 65. минута.
Вечерва ќе се комплетира ова 15. коло, а потоа следува мини-пауза за католички Божик пред Ла Лига да продолжи на 29, 30 и 31 декември.
