Станува збор за хибридни и целосно електрични возила, односно за сите автомобили кои имаат електричен мотор во погонскиот склоп.
Германскиот производител во вторникот објави дека продал милион електрифицирани возила и дека планира да испорача вкупно 2 милиони чисто електрични возила до 2025 година.
Околу 70 отсто од електрифицираните BMW автомобили продадени досега се хибриди, рече членот на одборот Питер Нота на тркалезната маса со новинарите, додавајќи дека компанијата верува дека хибридните модели ќе продолжат да играат важна улога, особено за клиентите за кои полнењето не е лесно достапно.
Како уште еден важен чекор кон поодржлива автомобилска индустрија, лидерот на BMW ја истакна континуираната модернизација на автомобилите на фосилни горива.
Во обид да ги намали емисиите на стакленички гасови, BMW долго време се залагаше за инвестирање во различни напредни технологии и не се фокусираше само на електрични автомобили со батерии.
Компанијата се противи на целосна забрана за продажба на возила со мотори со внатрешно согорување, како што најавија многу земји и производители на автомобили.
BMW има намера да ја постигне целта до 2030 година најмалку 50 отсто од неговата глобална продажба да биде составена од целосно електрични возила, но постојано повторуваше дека недостатокот на инфраструктура за полнење е главна пречка за масовното прифаќање на електричните возила.
Продажбата на BMW во ноември беше малку под нивото од минатата година бидејќи недостигот на чипови продолжува да ја ограничува понудата. И покрај тоа, компанијата е убедена дека ќе успее да постигне раст на приходите во однос на минатата година.
