Познато е дека кафето ги бои забите, а неговата киселост може да ја оштети забната глеѓ. Но, стоматолозите велат дека забите треба да ги миеме пред пиење кафе и објаснуваат зошто е тоа подобра опција.
„Миењето заби пред пиење кафе ги отстранува наслагите и спречува таложење дамки“, вели стоматологот Кристина Мајнерс. Киселоста што се создава со пиење кафе ја слабее забната глеѓ која ги штити од физички и хемиски оштетувања.
Мајнерс наведува дека со миењето заби по пиење кафе ја триеме киселоста во забите и тоа може да ги оштети и направи почувствителни.
„Ако тоа ви се случи од време на време, не паничете. Но, ако тоа го правите почесто, ќе ја потрошите забната глеѓ“, смета стоматологот Сиама Мухамед.
Ако едноставно не можете, а да не ги измиете забите по првото кафе, стоматолозите советуваат да почекате барем 30 минути пред да го направите тоа.
„Вашата плунка ќе ја неутрализира киселоста во устата, а по половина час усната шуплина се враќа во првобитна состојба и киселоста е каква што би требало да биде. Миењето заби со четка во тој момент е сосем добра одлука“, објаснува докторката Соња Красилников, стоматолог од Њујорк.
Како алтернативно решение, може да џвакате мастика без шеќер за стимулација на производство на плунка, природен заштитен фактор на усната шуплина.
