Данска привремено ја суспендираше вакцинацијата со AstraZeneca против COVID-19 откако се појавија извештаи дека вакцината предизвикува згрутчување на крвта, што беше причина и за еден смртен случај во земјата, пишува Reuters.
Претходно и Австрија ја прекина употребата на оваа вакцина додека истражуваат смртен случај поради нарушување на коагулацијата и појава на белодробна емболија.
Вакцината ќе биде суспендирана на 14 дена. Од Агенцијата не изнесоа повеќе детали за пациентот кој доби згрутчување на крвта. Од данската агенција за лекови велат дека истрагата ја покренале заедно со одговорните агенции во другите ЕУ земји, како и со Европската агенција за лекови.
„Важно е да нагласиме дека нема да ја користиме вакцината на AstraZeneca, туку ќе ја ставиме на чекање“, рече Сорен Брострем, директорот на Данската здравствена служба.
Австриските власти на 7 март исто така ја прекинаа имунизацијата на граѓаните со вакцините со AstraZeneca додека трае истрагата за смрт на едно лице.
Покрај Австрија, Естонија, Литванија, Луксембург и Латвија исто така привремено ја суспендираа вакцинацијата со AstraZeneca додека трае истрагата.
Портпаролот на Европската комисија задолжен за здравство, Стефан Де Керсмакер, на денешниот брифинг за новинари изјави дека за случајот со здравствени компликации во Данска поради вакцината на AstraZeneca, ќе се чека ставот на Европската агенција за лекови, ЕМА.
„Го следиме мониторингот на ЕМА и ќе го следиме нејзиниот став. ЕМА усвои прелиминарен став дека нема индикации дека оваа вакцина води до вакви појави, ќе следиме што ќе каже агенцијата бидејќи е на најдобра позиција за давање научно мислење“, изјави портпаролот за здравство.