Француската Лиг 1 повеќе не е дел од топ 5 на Стариот континент, согласно коефициентот на УЕФА според кој се одредуваат местата во европските натпреварувања.
Со години наназад Лиг 1 беше дел од елитата заедно со англиската Премиерлига, шпанската Ла Лига, германската Бундеслига и италијанската Серија А, но тоа повеќе не е случај.
Во сезоната 2023/2024 која почнува наскоро, Лиг 1 испадна од топ 5, а нејзиното место го зазеде холандската Ередивиси.
Премиерлигата и натаму е прва, Ла Лига втора, Серија А трета, додека Бундеслигата четврта.
Што се однесува на македонската 1.МФЛ, го има убедливо најлошиот рејтинг откако постои ваквото рангирање на УЕФА. Македонската лига се наоѓа на 53. место од вкупно 55 рангиранни, а зад нас се само лигите на Сан Марино и Андора. Внимавајте, подобар рејтинг од нас има и лигата на Гибралтар! Исто и лигите на Малта, Луксембург, Фарски Острови, Северна Ирска, Косово...
Македонските претставници во европските натпреварувања летово ќе треба да остварат колку може повеќе победи, за да соберат поени и Македонија да скокне на рангирањето. Лигите на Црн Гора, Гибралтар и Белорусија, кои се над нас, не се недостижни, но за тоа ќе требаат победи, бидејќи победа носи најмногу поени. Загубен натпревар, без разлика на резултатот, не носи поени. Така, пораз од 3:2 и пораз од 7:0 имаат иста тежина. Нерешено носи половина поени.
Последните неколку сезони македонските претставници во Европа бележеа лоши резултати, што и се одрази на рејтингот на лигата.
Летово Македонија во фудбалска Европа ќе ја претставуваат: шампионот Струга во квалификациите за Лигата на шампионните, куп победникот Македонија ЃП во квалификации за Европа конференциската лига заедно со второ и третопласираните од лигата, Шкупи и Шкендија.
Порталот football-coefficient редовно ги апдејтира коефициентите, па на нивниот сајт може да се следи напредокот/падот на македонската лига.
