Голманот на ПСЖ Џанлуиџи Донарума во интервју за Sky Sport изјави дека сака да остане во актуелниот француски шампион и да остварува победи со него.
„Целта беше да ја освоиме десеттата титула. Жал ни е за Лигата на шампионите“, изјави 23-годишниот италијански голман.
Донарума оваа сезона ја подели минутажата со Кејлор Навас. Додека Италијанецот бранеше на 22 натпревари, Костариканецот стартуваше на 24.
„Имам одличен однос со Навас. Но, сакам да бидам во стартната постава. Нештата мора да се сменат, тоа не е лесна ситуација за голман, како што рече Кејлор“ изјави Донарума.
Да потсетиме, Навас даде речиси идентична изјава неколку дена претходно, велејќи дека е незадоволен што не е во стартните 11 на сите натпревари.
„Имам добри односи со Донарума, но сакам да играм на сите натпревари.“
Година на прилагодување
„Лео Меси сè уште е најдобар во светот. Видовме колку е важен за нас во решавачките игри. Ние сме одличен тим. Мораме да го завршиме првенството на најдобар можен начин“, изјави Донарума, кој пристигна во ПСЖ минатата година. „За мене ова беше година на прилагодување.“
Да потсетиме, парискиот клуб синоќа обезбеди уште една титула, осма во последните десет години. Иако се шампиони, навивачите на ПСЖ почнаа да го напуштаат стадионот на 15 минути пред крајот на натпреварот.
„Жал ни е бидејќи тие секогаш нè поддржуваат, тие се нашиот 12-ти играч. Ги разбираме, и сакавме да направиме повеќе во Европа“, изјави Италијанецот.