Израелски научници објавија дека тројна вакцина против коронавирус со вакцината на Pfizer/BioNTech обезбедува значителна заштита од новата варијанта омикрон на вирусот SARS-CoV-2.
Заклучоците од истражувањето се слични со оние шро претходно неделава беа презентирани од BioNTech и Pfizer, што беа првиот знак дека дополнителните дози на вакцината би можеле да бидат клучни за заштита од новоидентификуваната варијанта на коронавирусот.
Истражувањето, спроведено од медицинскиот центар Шеба и Централната виролошка лабораторија на израелското Министерство за здравство, ја спореди крвта на 20 лица кои примиле две дози од вакцината пред пет до шест месеци со исто толку луѓе кои ја примале третата доза пред точно еден месец.
-Лицата кои ја примиле втората доза пред пет или шест месеци немаат способност да го неутрализираат омикронот. Иако имаат некои против делта, изјави Гили Регев-Јочај, директор на Одделот за заразни болести во Шеба. Добрата вест е што со третата доза за 100 отсто се зголемува способноста за неутрализирање. Има значителна заштита со третата доза. Таа е пониска од способноста да се неутрализира делта варијантата, или за околу четири пати помала“, додаде таа.
Израелскиот тим соопшти дека работеле со жив вирус додека фармацевтските компании го користеле тоа што е познато како псевдовирус, кој има карактеристични омикронски мутации.
Израелското истражување следи по истражувањето од Јужна Африка кое покажа дека омикрон може делумно да ја заобиколи заштитата што ја обезбедуваат две дози од вакцините.
