Светското првенство доби уште два учесника откако претпоследното коло во азиските квалификации стартуваше утринава со победата на Јапонија на гости кај Австралија.
Јапонците беа во подобра позиција на табелата, им одговараше и реми, а со победа дефинитивно си ја заверија визата за Мундијалот во Катар и воедно ја испратија таму и Саудиска Арабија.
Откако првиот дел заврши без голови се чинеше дека и натпреварот ќе заврши со тој резултат, но во последните минути паднаа два гола, и двата дело на резервистот Каору Митома кој настапува за белгискиот прволигаш Ројал Унион. Во 89-тата минута по една одлична акција Митома погоди за 0:1, а во 4. минута од судиското надополнување се прошета низ домашната одбрана и со втор гол стави печат на драгоцената победа.
Со овие 3 бода, освоени во директен дуел со ривалот Австралија, Јапонците собраа 21 бод, или 6 повеќе од Австралија со само еден натпревар до крајот, што значи дека веќе можат да размислуваат за Мундијалот.
Иако Саудиска Арабија својот натпревар од ова 9. коло ќе го игра од 16 часот на гости кај Кина, победата на Јапонија ги израдува и нив. Со 19 бодови Саудиска Арабија има 4 повеќе од Австралија која веќе не може да се искачи погоре од 3. место, што значи дека Саудијците одат на Светско, додека Австралија во бараж.
Табела со некомплетно 9. коло:
Со денешните два квалификанта сега познати се 17 земји учеснички на завршницата, вклучувајќи го и домаќинот Катар.
Денешниот ден нуди богата квалификациска програма со натпревари во сите зони, а за нас интересното доаѓа во 20:45 часот кога Македонија ќе ѝ се спротивстави на Италија со директен пренос на SK1.