Земјата на хокејот е едно од најпријатните изненадувања во квалификациите каде синоќа на коло до крајот обезбеди пласман на завршницата во Катар.
Кога ќе се спомене фудбал дефинитивно не се помислува на Канада, земјата каде дечињата веднаш по проодувањето облекуваат лизгалки и ги учат вештините на мразот. Но, фудбалот во оваа земја станува сѐ попопуларен, а за тоа говори и неверојатниот успех кој го направи нивната репрезентација.
Канаѓаните на домашен терен на „БиЕмОу Филд“ во Торонто ја пречекаа Јамајка и со леснотија ја остварија потребната победа. Кајл Ларин уште во 13. минута најави таков расплет на настаните, а на минута пред паузата Тејџон Бјукенен го дуплираше водството.
Во вториот дел следуваше помирна игра, а головите дојдоа на самиот крај. Прво Џуниор Хојлет во 83. минута зголеми на 3:0, а конечниот резултат дојде со автоголот на Адриан Мариапа на две минути пред последниот свиреж.
Со оваа победа Канада го обезбеди првото место во групата со 28 бодови пред САД и Мексико кои имаат по 25. Од оваа зона првопласираните три репрезентации одат на завршницата, а Канаѓаните имаат и подобар меѓусебен скор со двата северномаерикански великани Мексико (1:1, 2:1) и САД (1:1, 2:0).
Колку Канада беше убедлива во квалификациите говори и фактот што претрпе само еден пораз и тоа на гостувањето кај Костарика со 1:0 пред неколку дена.
Канада прв и последен пат на Мундијал учествуваше во 1986 година во Мексико кога ги загуби сите три натпревари и не успеа да постигне ниту гол (Франција 0:1, Унгарија 0:2, СССР 0:2). оттогаш најчесто не беше ни блиску до нов пласман, а сега сите ги изненади со доминацијата во Северна Америка.
Предводени од 39-годишниот ветеран Атиба Хачинсон, кој со години настапува во средниот ред на турски Бешикташ, канадскиот состав има и неколку познати имиња. Тоа се напаѓачот Џонатан Давид од Лил, левиот бек Алфонсо Дејвис од Баерн, дефанзивниот играч од средината Стивен Еустакио од Порто, напаѓачот Кајл Ларин од Бешикташ и голманот на белградска Црвена звезда - Милан Борјан.
Селектор е англискиот стратег Џон Хрдман кој пред да ја преземе канадската репрезентација ги водеше единствено женските репрезентации на Канада и Нов Зеланд и нема никакво друго тренерско искуство. Откако ја води Канада од јануари 2018 година има 72,5% успешност бидејќи на 40 натпревари забележа 29 победи, 4 нерешени и само 7 порази.
„Имав впечаток дека оваа земја никогаш не веруваше во нас бидејќи претходно не им ни дадовме никаква причина за верба. Сега веруваат. Сите стоиме еден покрај друг - ова е времето за сите да застанеме зад фудбалот и да се обединиме, бидејќи можеме да бидеме фудбалска велесила. И време е. Имаме дете кое освојува Лига на шампиони (Алфонсо Дејвис, заб. на прев.), имаме играчи низ цела Европа, имаме деца чие време допрва доаѓа“, вели возбудениот селектор Хрдман.
„Ние сме најдобриот тим во Северна Америка. Неверојатно е колку сега луѓето веруваат во нас. И ќе биде подобро. Сега сакаме да отидеме на Мундијалот и таму на направиме нешто“, изјави Џонатан Осорио, играч од средниот ред кој настапува во домашниот гигант Торонто.
