Зимските олимписки игри во Пекинг се играат под чудни околности, најмногу поради мерките околу коронавирусот.
Денеска се одигра еден од најнеобичните натпревари, на хокеарскиот турнир за жени. На натпреварот меѓу Канада и Русија двете селекции носеа маски под заштитни кациги.
Натпреварот за малку немаше да се одигра бидејќи Канада инсистираше на нови PCR тестови на руските хокеарки. По 75 минути одложување, беше најден компромис мечот да се одржи, но со медицински маски на лицето.
Канада беше апсолутно против Русинките да играат без маски.
Почесниот претседател на Меѓународната хокеарска федерација Рене Фасел ја коментираше ситуацијата:
„Не знам што да кажам. Не разбирам што навистина се случува. Не гледам како е можно да се игра хокеј под медицински маски. Нема смисла. Не можам да замислам како можеш да играш таков спорт носејќи маски. Невозможно е“.