Светското првенство во ракомет ќе се игра од 11 до 29 јануари во Полска и Шведска. Светската ракометна федерација го објави протоколот за коронавирус пред две недели, но на осум дена пред почетокот на турнирот организаторите ги изненадија сите учесници со детали за протоколот и нови информации.
Федерациите на сите земји учеснички мора да обезбедат негативни тестови кои се направени најрано 72 часа пред почетокот на првенството. Исто така, ИХФ ќе спроведува постојани и масовни тестирања за време на турнирот.
Сите репрезентативци кои ќе учествуваат на Мундијалот ќе треба да направат антиген тест по првото коло и уште еден по главната рунда од натпреварувањето.
Сите кои ќе бидат позитивни ќе мора да бидат изолирани пет дена, а во тимот ќе можат да се вратат најдоцна пет дена по позитивниот тест, откако ќе добијат негативен ПЦР тест.
Играчите кои ќе дојдат во контакт со позитивни членови и нема да бидат позитивни на тестот, нема да мора да одат во изолација и ќе можат да го продолжат натпреварувањето.
Сличен начин беше забележан и лани на Европското првенство кога селекторите секојдневно остануваа без решенија на одредени позиции, па целокупната ситуација на крајот од првенството го направи малку бизарно.
За да ги надомести потенцијалните отсуства, ИХФ објави дека промените поради можни позитивни случаи нема да се земат предвид во петте измени одобрени за време на турнирот. Форматот на турнирот е ист како и на последното Светско првенство – 32 репрезентации ќе бидат поделени во 8 групи од по 4 репрезентации.
Трите најдобри селекции од секоја група продолжуваат во второто коло, што носи вкрстување на групите, а потоа двете најдобри селекции од новоформираните групи од второто коло ќе се пласираат во четвртфиналето, од каде што започнува нокаут фазата.
На минатиот Мундијал пред две години коронавирусот направи големи проблеми. Репрезентациите на Чешка и САД поради голем број на заразени го откажаа учеството, па ИХФ ги покани Македонија и Швајцарија да настапат како замени. Потоа во текот на турнирот дебитантот Зелен 'Рт на тестирањата по првото коло доби куп позитивни ракометари и останатите натпревари ги загуби со службен резултат.
Македонија е во групата Ф заедно со Норвешка, Аргентина и Холандија, а првиот натпревар го има на 13-ти против Норвежаните со почеток во 20:30 часот во полски Краков.
Бранител на тронот е Данска.