Германските служби сметаат дека Меделин Мекен, Британката која беше грабната кога имаше речиси четири години од одморалиште во Португалија во 2007 година, најверојатно била убиена набрзо по киднапирањето, објави The Times of London.
Осомничен за нејзиното грабнување и убиство е 43-годишен Германец идентификуван како Кристијан Б., кој во декември, 2019 година добил затворска казна по обвинение за силување на 72-годишна Американка во Португалија во 2005 година.
Тој има поднесено жалба на пресудата и во моментов отслужува 21-месечна затворска казна за продавање дрога.
Германскиот обвинител Ханс Кристијан Волтерс кој ја води истрагата за Меделин откако беше утврден новиот осомничен, изјави:
„По мое лично мислење, тој релативно брзо го убил девојчето, откако најверојатно сексуално го злоставил. Сметаме дека нашиот осомничен има извршено многу злосторства, особено сексуални, како во Португалија, така и низ Германија.“
Според судските документи, осомничениот ја силувал жената од САД во вила во близина на Праиа да Луз, истото одоралиште каде престојувала Меделин со нејзиното семејство кога беше грабната.
Кристијан Б. во октомври 1994 година добил две години казна во поправен дом за сексуално злоставување дете.
Лондонската полиција минатата недела соопшти дека осомничениот патувал со кампер комбе низ Португалија во истиот период кога Меделин исчезна.
Ноќта кога таа исчезна, осомничениот бил во Праиа да Круз и примил телефонски повик што траел речиси 30 минути. Полицијата ја смета личноста која му се јавила за „клучен сведок“.
