Човекот кој негативно го реши пенал-рулетот за Шпанија ја прекина тишината и се огласи за лошото искуство.
Алваро Мората прво ја спаси Шпанија од пораз откако постигна израмнувачки гол на 10 минути пред крајот и го одведе натпреварот во продолженија. Победник немаше ни по дополнителните половина час игра, па натпреварот замина во пенал-рулет.
Таму, во четвртата серија при водство на Италија од 3:2, Џиџи Донарума го одбрани ударот на Мората во десниот долен агол, шут кој потоа се покажа решавачки бидејќи Жоржињо потоа беше сигурен реализатор испраќајќи ги „Аѕурите“ во финале.
„Овој тим заслужи повеќе, многу повеќе. Како и цела Шпанија, така беше и мој сон, наш сон. Можам само да кажам дека сум горд што бев дел од оваа екипа. На сите кои веруваа во нас, БЛАГОДАРАМ. Фудбалот понекогаш знае да биде многу тежок. Да живее Шпанија“, напиша тој на својот Instagram профил.
Поради промашувањето, играчот на Јувентус е цел на лавина критики и напади од страна на навивачите кои во него гледаат причина зошто Шпанија е елиминирана.
Селекторот Луис Енрике на вчерашната прес-конференција по завршувањето на натпреварот застана во негова одбрана.
„Имаше проблем со адукторот, но без разлика на тоа сакаше да го изведе пеналот и тоа многу кажува за тоа каква личност е. Со тешките ситуации одлично се справи, им создаде проблеми на противниците и постигна гол“, рече тој.
