Додека навивачите на Интер веќе го заборавија белгискиот голгетер, се чини единствен кој сѐ уште пати од неговото заминување е неговиот поранешен партнер од нападот.
Лаутаро Мартинес нема постигнато гол на последните 6 натпревари во Серија А. Сезонава не постигна гол нуту на седумте натпревари од Лигата на шампионите, како и на двата во Копа Италија.
Единствено му успеа да ја затресе мрежата во натпреварот од италијанскиот Суперкуп против Јувентус на 12 јануари, што е негов единствен гол во 2022 година.
По промените летоска, Симоне Инѕаги го направи Лаутаро партнер со Един Џеко во нападот. И покрај месеци играње заедно и воигрување на тренинзите, очигледно двајцата имаат проблем во функционирањето како напаѓачко дуо.
И додека на Босанецот тоа очигледно не му претставува проблем, непостоењето на хемија помеѓу двајцата се одразува врз 24-годишниот Аргентинец. Аналитичарите велат дека тоа е поради тоа што Џеко има различен стил на игра од Лукаку, а на Лаутаро многу повеќе му лежи стилот на Белгиецот.
Од она што го видовме сезонава, Алексис Санчес многу подобро соработуваше со Џеко, па оттаму La Gazzetta dello Sport пишува дека Лаутаро може да го загуби местото во почетните 11 за Санчес да влета.
Лаутаро сепак не е заспан сезонава бидејќи досега погоди 11 пати во Серија А, но последниот пат во 18. коло на 17 декември 2021. Од тие 11 голови само 1 бил по асистенција на Џеко, и тоа не директна, туку Џеко изнудил пенал кој Лаутаро го реализирал. Тоа доволно говори за нивната соработка.
Додека нападот на „Нераѕурите“ беше предводен од дуото Лукаку-Лаутаро, медиумите го нарекуваа Лу-Ла поради нивната одлична соработка.
Лаутаро не е единствен што пати од заминувањето на Лукаку, бидејќи Белгиецот уште полошо се снаоѓа во Челси каде сезонава постигна само 5 гола во Премиер лигата.