Шарлин, сопругата на принцот Алберт од Монако, се нема појавено во јавност уште од минатата година, а сега светските медиуми носат нови информации - таа веќе не е ни во Монако.
Годинава Шарлин пропушти неколку важни настани каде инаку секогаш се појавуваше со години наназад, што го привлече вниманието на медиумите. Кога не се случи ни прославата за 10-годишнината од бракот и јавното појавување со принцот Алберт, на почетокот на јули, беше јасно дека нешто не е во ред.
Според последните информации, Шарлин се вратила во родната Јужноафриканска Република, а кога медиумите ја објавија информацијата, следеше официјално соопштение од палатата - „Принцезата страда од инфекција на уво, грло и нос и треба да помине бројни процедури, па таа ќе остане во Јужноафриканската Република на неодредено време“.
Таа замина во својата татковина по смртта на две драги и блиски личности, но остана таму и реши да му помогне на локалното население во борбата против ловокрадството.
На својот официјален профил на Instagram, принцезата Шарлин објави драматична фотографија, на која позира со локална единица која се бори против ловокрадството, но и со еден од најзагрозените животински видови, носорозите, со цел да се подигне свеста за оваа страшна борба што може, на крајот, да го загрози животинскиот свет.
„Најтажната принцеза во Европа“, како што ја нарекуваат медиумите, избегна многу должности во Монако последните месеци, што предизвика загриженост за нејзиниот брак и титула, но сега се појасни зборовите на принцот Алберт Втори, кој се појавува во јавноста само во друштво на нивните близнаци Габриел и Жак, дека сè е во ред со неговата сопруга и дека нема причина за загриженост.
Принцезата беше фотографирана на крајот на 2020 година кога избричи дел од косата, а медиумите пишуваа дека тоа е нејзиниот бунт поради гласините дека нејзиниот сопруг имал афери и крие вонбрачни деца.