По долги преговори тимот од Неапол конечно јавно се пофали дека за наредната сезона ќе биде посилен за грузиксиот бисер Хвича Кварацхелиа.
Претседателот Аурелио Де Лаурентис денеска говорејќи за радиото Kiss Kiss меѓу другото откри и дека сѐ е договорено со најталентираниот фудбалер на Грузија и тој е веќе во сопственост на италијанскиот клуб. Потпишал 5-годишен договор според кој ќе заработува околу 1,5 милиони евра посезона.
„Се надевам дека сум направил одлична зделка, тој е веќе играч на Наполи“, кратко соопшти Де Лаурентис.
Кварацхелиа е офанзивец кој игра како крило. Во февруари наполни 21 година, а доаѓа од редовите на Динамо, клубот од главниот грузиски град каде и ја почна кариерата. Од летото 2019 настапуваше за руски Рубин, но по одлуката на ФИФА дека поради руската воена интервенција во Украина сите странски фудбалери можат да го напуштат руското првенство, Хвича одлучи да ги спакува куферите и на кратко да се врати во татковината.
Се работи за одличен техничар кој е и брз и продорен играч. Вистински бисер од кој Грузијците очекуваат многу, па не бадијала го нарековме Грузискиот Елмас, бидејќи се и слични според стилот на игра.
Репрезентативец на Грузија е од јуни 2019 година кога имаше само 18 години. Деби голот во националниот дрес го постигна, ако се сеќавате, против Македонија на оној натпревар од октомври 2020 година кој заврши 1:1, а се играше во Скопје во рамките на Лигата на нации. Македонската јавност го знае и по тоа што го пропушти баражот за пласмaн на ЕУРО 2020 откако фати ковид ден пред одлучувачкиот натпревар, што беше голем удар за грузиската репрезентација која тогаш остана без својот најголем адут.
Во Наполи се очекува да биде замена за Лоренцо Инсиње кој најави дека кариерата ќе ја продолжи во канадски Торонто, кој настапува во МЛС лигата.
