Поранешниот италијански голман Иван Лува Вавасори стана платен борец во Украина, а сега се наоѓа во болницата во Мариупол.
Вавасори е роден во Русија во 1992 година, а бил посвоен од семејството Вавасори во Италија. Стана голман и бранеше за разни клубови од Серија Чи и Ди како Алчоне, Про Патрија, Бра, Лењано и Витуоне каде последно настапуваше во 2017 кога кариерата ја продолжи во Боливија.
Вавасори ѝ се приклучи на украинската армија во февруари и постираше неколку фотографии од војната на својот профил на Facebook. Неговиот татко Пјетро е поранешен сопственик на компанијата за логистика Italsempione и воедно поранешен претседател на Про Патрија, клуб во Италија познат како собиралиште на екстремната десница. Пред неколку дена Иван Лука објави на социјалните мрежи дека се наоѓа во „самоубиствена мисија“ во Украина.
„Имаме многу малку единици против цела армија, но претпочитаме да се обидеме. Она што е важно е да се умре достоинствено; само тогаш почнува животот“, напиша Вавасори.
Во Италија се стравуваше дека тој една од петте жртви на рускиот напад врз Мариупол минатата недела. Но, утринава неговото семејство потврди дека Лука е жив. „Лука е жив и се наоѓа во болница“, соопшти неговиот татко. Русите го освоија градот, но фабриката Азовстал останува бастион на украинскиот отпор.
Весникот Il Messaggero објави дека миланскиот јавен обвинител отворил истрага за неговата мисија во Украина како платеник.
Вавасори немаше голема фудбалска кариера, а некои можеби се сеќаваат на него бидејќи беше дел од пријателскиот натпревар против Милан во 2013 година кога Кевин Принс Боатенг го напушти теренот откако навивачите на Про Патрија расистички го навредуваа.
