Некои луѓе со „среќни гени“ или одредена ДНК можат да добијат дополнително силна заштита по вакцинирање против ковид, велат научници од Универзитетот Оксфорд.
Истражувачи открија дека луѓето со верзија на генот HLA-DQB1*06 имаат посилен имунолошки одговор по вакцинирање од останатите. Студијата е објавена во списанието Nature Medicine, а потребни се повеќе истражувања за да се потврдат резултатите.
Истражувачите анализирале примероци на крв од луѓе кои учествувале во пет различни испитувања, вклучително и 1.600 возрасни кои првпат примиле вакцина на Oxford-AstraZeneca или Pfizer-BioNTech.
Откриле дека месец дена од примањето на првата доза вакцина, луѓето со споменатата варијанта на ген имале поголема веројатност да имаат повисоко ниво на антитела, отколку луѓето кои имале други верзии на ген.
Студијата следела и група луѓе кои имале неделни тестови на ковид повеќе од една година по првото вакцинирање. Откриено е дека оние кои ја имале споменатата варијанта на ген имале помала веројатност да доживеат „пробивна инфекција“ во тој временски период во кој луѓето и понатаму добивале блага инфекција на ковид по вакцинација.
Научниците признале дека и други фактори придонесуваат за ризикот од добивање ковид вклучително и возраста, други болести, но и професијата. Сепак, велат дека генетиката и понатаму играла главна улога откако овие фактори ќе се земат во обѕир, пишува BBC.
Сепак, потребна е дополнителна работа за подобро да се разбере клиничкото значење на оваа специфична поврзаност, сметаат научниците. Потенцираат дека вакцините се најдобриот начин на кој луѓето можат да се заштитат од ковид и повикуваат на бустер доза оваа есен за да се зацврсти имунитетот,
Оваа зима постои страв од комбинација на грип и ковид, па ризичните групи е најдобро да се вакцинираат против двата вируса.
