Синоќа Норвежанецот постигна ефектен гол со потег налик на кунг-фу кој дефинитивно ќе конкурира за еден од најубавите голови сезонава.
По натпреварот, на официјалната прес-конференција, тренерот на Манчестер Сити зборуваше и за голот на Ерлинг Холанд кого го опиша како комбинација од двајца легендарни фудбалери.
„Можеби луѓето кои ме познаваат знаат какво влијание имаше Јохан Кројф на мојот живот како личност, ментор кој пред години постигна неверојатен гол за Барселона на 'Камп Ноу' против Атлетико. Истиот момент кога Ерлинг го постигна голот си помислив дека е доста, доста сличен. Се сетив и на мојот драг пријател Ибрахимовиќ, кој има ваква способност да стави нога на кров, а Ерлинг е доста сличен во тоа“, рече Пеп.
„Мислам дека тоа му е природно, тој е еластичен, флексибилен, а згора на тоа поседува и способност да направи контакт и да ја смести топката в гол. Мислам дека таа флексибилност му е од мајка му и татко му“, додаде каталонскиот стратег.
Татко му на Ерлинг е поранешниот норвешки фудбалер Алфи Холанд, кој играше како дефанзивец за Нотингем Форест, Лидс Јунајтед и Манчестер Сити во Англија. Но, и неговата мајка Гри Марита Браут е поранешна спортистка и тоа атлетичарка која се натпреварувала во седмобој (100 м со пречки, скок во висина, фрлање ѓуле, 200 м, скок во далечина, фрлање копје и 800 м).
Манчестер Сити синоќа ја совлада Борусија, всушност довчерашниот клуб на Холанд, со 2:1, иако гостите први поведоа преку Џад Белингам во 56. минута. Џон Стоунс во 80-тата израмни, а Холанд му пресуди на својот поранешен клуб 4 минути подоцна.
